«Էս պահի դրությամբ, կոնկրետ «դեմ»-ի խնդիր ես չեմ տեսնում». Մարտուն Գրիգորյանը նոր Սահմանադրության մասին


«Էս պահի դրությամբ, կոնկրետ «դեմ»-ի խնդիր ես չեմ տեսնում». Մարտուն Գրիգորյանը նոր Սահմանադրության մասին

1in.am: Նախկին ԲՀԿ-ական, պատգամավոր Մարտուն Գրիգորյանը Սերժ Սարգսյանի իշխանությունը տապալող ճակատի կարկառուն ներկայացուցիչներից էր, ով երեկ նախագահականում մասնակցում էր Սահմանադրական փոփոխությունների նախագծի կոնսուլտացիային։ Մարտուն Գրիգորյանը այս փոփոխության խոցելի ներկայացուցիչներից է։ Նա մեծամասնական ընտրակարգով պատգամավոր է և ունի հստակ ընտրազանգված։ Իսկ փոփոխությունից հետո նա Խորհրդարան մտնելու այլընտրանք չունի՝ բացի որևէ կուսակցության ցուցակում անդամագրվելուց։ Առայժմ պարզ չէ՝ որ ցուցակում կհանգրվանի նախկին ընդդիմադիր ԲՀԿ-ականը։ Մի բան է հայտնի՝ նրա և Սերժ Սարգսյանի հարաբերությունները բարելավվել են, ինչպես ինքն է ասում՝ «Ի շահ Գյումրիի»։

«Առաջին լրատվական»-ը Մարտուն Գրիգորյանի հետ զրուցել է Սերժ Սարգսյանի հետ երեկվա քննարկման և իր պատգամավորական կարիերայի ճակատագրի մասին։

-Սահմանադրական փոփոխությունների նոր նախագիծը հատկապես խնդրահարույց է մեծամասնական ընտրակարգով ընտրված անկուսակցական պատգամավորների համար։ Ինչպես է լուծվելու հարցը, այս մասով ի՞նչ քննարկեցիք Սերժ Սարգսյանի հետ։

-Դե հայտնի է՝ այս նախագծով հարյուր տոկոս համամասնական ընտրակարգն է լինելու, քննարկվում է նաև պատգամավորների ռեյտինգային տարբերակը, այս մասին հարց բարձրացվել է, քննարկվել է, բայց ավելի մանրամասն ու պարզ կլինի, երբ որ նախագիծը բերվի Ազգային ժողով։ Այս մասով Ընտրական օրենսգրքում մեծ անելիք կա, այդ պատճառով հարցերի զգալի մասը կքննարկվեն արդեն Ընտրական օրենսգքրի փոփոխությունների ժամանակ Ազգային ժողովում։

–Եթե նույնիսկ ռեյտինգային տարբերակը ընդունվի, միևնույն է, տվյալ պատգամավորը պետք է ընդգրկվի որևէ կուսակցության ցուցակ։ Դուք ո՞ր ցուցակում եք Ձեզ պատկերացնում։

-Այո՛, այս փոփոխությամբ կուսակցություն մտնելը պարտադիր չէ, բայց կուսակցության ցուցակը փաստորեն պարտադիր է, եթե ես որոշեմ գալիք խորհրդարանական ընտրություններում առաջադրվեմ, բնականաբար, այդ ժամանակ արդեն պետք է մտածեմ այդ մասին, քանի որ այլընտրանք այս պարագայում չկա։

-ԲՀԿ-ի ցուցակում ձեզ պատկերացնո՞ւմ եք, եթե հաշվի առնենք, որ այս ընթացքում անգամ պատերազմող կողմերը՝ Ծառուկյանն ու Սերժ Սարգսյանը, հաշտվեցին և նույնիսկ տպավորություն է՝ կարծես չի էլ եղել իշխանափոխության ժամանակահատվածը։

-Այդ հարցին պատասխանելը դժվար է, քանի որ այս ընթացքում բավականին լուրջ գործընթացներ են ձևավորվելու։ Այս ընթացքում պարզ կլինի Ազգային ժողով առաջադրվել-չառաջադրվելու հարցը։ Առաջին հերթին պետք է հստակեցվի այս հարցը, որից հետո որևէ կուսակցության ցուցակ ընդգրվելը։ Գաղտնիք չէ, պահելու բան չունեմ, ես՝ որպես պատգամավոր, փորձել եմ իմ հնարավորություններն օգտագործել ի շահ ժողովրդի։

Ես ԲՀԿ-ից դուրս գալուց հետո հայտարարել եմ, որ պատրաստ եմ համագործակցել այլ ուժերի, կուսակցությունների հետ, որոնք որ պատրաստ են ի շահ Գյումրի քաղաքի աշխատել։ Ես էս ընթացքում մի քանի անգամ հանդիպել եմ նախագահի հետ, ներկայացրել եմ Գյումրու հետ կապված խնդիրները, ինչպես նաև այդ խնդիրների լուծման վերաբերյալ ծրագրերը, և էս պահի դրությամբ նախագահը իմ առաջարկած մի քանի ծրագրերին հավանություն է տվել, պատրաստակամություն հայտնել, որ այդ ծրագրերը իրականացնենք։ Խոսքը ճանապարհների նորոգման հետ կապված ծրագրերի մասին է։

-Այսօրվա քննարկման ժամանակ Ձեր դիրքորոշումը հայտնեցի՞ք՝ դեմ եք, թե կողմ նախագծին։

-Կոնկրետ դիրքորոշում հայտնելու խնդիր չի եղել քննարկման ժամանակ՝ դեմ ենք, թե կողմ, պարզապես որ պատգամավորը ինչ հարցեր ուներ, բարձրացրել է, նախագահն էլ պատասխանել է այդ հարցերին։ Կոնկրետ ինձ երկու հարց էր հետաքրքրում՝ մեկը միասեռ ամուսնությունների վերաբերյալ, որը շրջանառության մեջ էր դրվել, մյուսը՝ խորհրդարանական ընտրության 2-րդ փուլի վերաբերյալ։ Առաջինի մասով իմ կասկածները փարատվեցին, բայց ԱԺ քննարկումների ժամանակ էլ խնդիրը կբարձրացնենք….

–Հիմա Դուք կո՞ղմ եք, թե՞ դեմ նախագծին։

-Էս պահի դրությամբ, կոնկրետ «դեմ»-ի խնդիր ես չեմ տեսնում, մնացածն էլ պարզ կլինի Ազգային ժողովում ընթացող քննարկումների արդյունքում, ավելի մանրամասն կքննարկվի, և դրանով պայմանավորված՝ վերջնական եզրահանգում կլինի։

-Մի քանի ամիս առաջ, երբ Դուք ԲՀԿ-ում էիք, ու կուսակցությունը պնդում էր, որ Սերժ Սարգսյանի վերարտադրության համար է, Սահմանադրության փոփոխության անհրաժեշտություն չկա, քանի որ այն չի լուծելու երկրի առջև ծառացած խնդիրները։ Դուք էլ էիք կողմ այս դիրքորոշմանը։ Ինչո՞ւ վերանայվեց Ձեր դիրքորոշումը։

-Ես էն ժամանակ կոնկրետ դիրքորոշում չեմ հայտնել, բայց դա եղել է կուսակցության քաղաքական որոշում, որին ենթարկվել են կուսակցության անդամները։ Հիմա ես կուսակցության անդամ չեմ, և էդ դիրքորոշման փոփոխության հետ կապված՝ կարող եք կուսակցությունից ճշտել։ Ես՝ որպես պատգամավոր, որպես անձ, թե՛ այն ժամանակ, թե՛ հիմա սահմանադրական բարեփոխումների վերաբերյալ կոնկրետ դիրքորոշում չեմ հայտնել։

-Սերժ Սարգսյանին ամիսներ առաջ անողոք քննադատողները, որոնց թվում էիք նաև Դուք, այս օրերին հայտնվել են հանրության քննադատության թիրախում, քանի որ ընդունել են Սերժ Սարգսյանի հրավերը։ Ինչպես եք ընդունում հանրության այս վերաբերմունքը նախկին ընդդիմադիրների նկատմամբ։

-Դե, բնականաբար, ովքեր որ դեմ են, մեզ քննադատում են, պայքարելու ուրիշ գործիքներ չունեն, պիտի փորձեն մարդկանց վարկաբեկել, բայց այդ հանդիպումներով, կարծում եմ, որ բաներ չեն փոխվում։ Հանդիպումները նրա համար են, որ կուսակցությունները, պատգամավորները հարցեր ունեն, պիտի բարձրացնեն ու քննարկեն, ու այդ բանակցությունների արդյունքում որոշեն։

-Քննադատողները հիմնավորում են, որ ընդդիմադիրների հանդիպումների նպատակը Սերժ Սարգսյանի հետ հաջորդ խորհրդարանական ընտրություններում մանդատի երաշխիքներ ստանալն է, ինչը Սերժ Սարգսյանը տալիս է նոր Սահմանդրության վերաբերյալ համձայնություն կորզելուց հետո։ Ձեր դեպքում հարցը ինչպե՞ս է լուծվելու։

-Ես ասում եմ՝ նախագահի հետ ես ունեմ պայմանավորվածություն, ինչը էսօրվա Սահմանադրական քննարկումների հետ պայմանավորված չէ, իմ հանդիպումները ավելի շուտ են եղել՝ կոնկրետ նախագահի հետ համագործակցության մասով։ Մանդատի մասին խոսք դեռ չկա, երկու տարի դեռ ժամանակ կա։ Իսկ մեր պայմանավորվածությունները նախագահի հետ, ինչպես նշեցի՝ վերաբերում են Գյումրի քաղաքի ճանապարհաշինությանը, քաղաքի բարելավմանը։

-Դուք այլ կուսակցության ցուցակ մտնելու բարդույթ ունե՞ք, ասենք, եթե Սերժ Սարգսյանի հետ Ձեր պայմանավորվածության շրջանակում աշխատանքը անխափան շարունակելու համար առաջարկվի ՀՀԿ ցուցակ մտնել, ինչ-որ բան կխանգարի՞ Ձեզ։

-Կոնկրետ ցուցակներում ընգրկվելը չպետք է ինքնանպատակ լինի։ Կոնկրետ պայմանավորված պետք է լինի այն հանգամանքով, թե ցուցակում ընդգրկված լինելով՝ կկարողանա՞ս արդյոք ժողովրդի համար մի բան անել։ Եթե մի ցուցակ պիտի մտնես ու դատարկ մանդատ ունենաս, դա ինչի՞ է պետք, եթե քո ձայնը լսելի չլինի, այդ մանդատը ինչի՞ համար է։ Ես կոնկրետ գյումրեցիներից մեկն էմ, ում լիազորել են աշխատել ժողովրդի համար, իմ մանդատն էլ պետք է ծառայի ժողովրդին…

–Այսինքն, եթե պետք լինի, ՀՀԿ էլ կմտնե՞ք։

-Ես չգիտեմ՝ ՀՀԿ-ն կլինի, ԲՀԿ-ն, թե որը, ամենակարևորը, որ մենք կարողանանք առաջ գնալ, և այդ ռեսուրսը ծառայեցնենք իմ քաղաքին։


Դիտումներ` 1977
Ամսաթիվ` 4-09-2015, 09:52
Տարածել սոցիալական ցանցերում:


Նմանատիպ այլ նյութեր:

Մարտուն Գրիգորյան.«Չարժե սեւեռվել միակուսակցականության գաղափարի վրա»

«ԱՅՍ ՊԱՀԻՆ «ԲԱՐԳԱՎԱՃ ՀԱՅԱՍՏԱՆԸ» ԿՈԱԼԻՑԻԱՅՈւՄ ՏԵՂ ՉՈւՆԻ»

ԲՀԿ-ն ՀԱՆՁՆՈւՄ Է ԳՅՈւՄՐԻՆ. ԲՀԿ-ական ՄԱՐՏՈՒՆ ԳՐԻԳՈՐՅԱՆԸ ԵՎՍ ԿՆՏՐԻ ՍԵՐԺ ՍԱՐԳՍ ...

ԵԹԵ ԳԱԳԻԿ ԾԱՌՈւԿՅԱՆԸ ՈՐՈՇԻ, ՈՐ ՊԵՏՔ Է ԳՆԱ ԸՆՏՐՈւԹՅՈւՆՆԵՐԻ, ՈւՐԵՄՆ ԿԻՍՈւՄ Է  ...

ՄԱՐՏՈՒՆ ԳՐԻԳՈՐՅԱՆԻ ՀԱՐՑԱԶՐՈՒՅՑԸ «ՇՐՋԱՊԱՏ» ՇԱԲԱԹԱԹԵՐԹԻՆ

Copyright © 2012 www.martungrigoryan.am | E-mail: info@martungrigoryan.am
developed by COMP-WEB Service
համակարգիչների վերանորոգում և ծրագրային սպասարկում, < a href="http://kayqeri-patrastum.comp-web.ru">Վեբ կայքերի պատրաստում և առաջխաղացում